Alg-a Lab promove residencias, grupos de investigación, encontros e workshops de maneira independente e autoxestionada, e  en colaboración con outras entidades e programas, tanto públicos como privados. Participan en redes e encontros diversos, establecendo diálogos tanto a nivel local, nacional como internacional e acollendo a artistas, investigadores e formadores de disciplinas emerxentes.

Interesadxs nas conexións entre tradición e vangarda, o analóxico e o tecnolóxico, o Colectivo de Artistas Alg-a caracterízase pola súa tendencia a combinar a innovación co arcaico e inmemorial do coñecemento e o seu marco común na Cultura Libre e compartida. Dispoñen de protocolos de solicitude para residencias, espazos de creación e investigación, así como eventos.

Cada vez son máis os colectivos que a súa vez se integran en Alg-a Laboratorio, pasando a ser, dalgún xeito, un proxecto de proxectos. Entre eles están: Curtopía (Festival de Curtametraxes), Radio Piratona (Radio Libre de Vigo) ou Tecnoloxías Apropiadas (grupo de investigación sobre bioconstrucción e sustentabilidade) así como proxectos que xorden do entorno de Alg-a Lab e despois se independizan, como pode ser Monte Noso ou Fablab Vigo entre outros.