Contexto
Cineuropa alcanza en 2016 os seus trinta primeiros anos de vida. Tres décadas compartindo entusiasmo con varias xeracións de cinéfilos e cinéfilas nunha cita, que ano tras ano, desde 1987, subliña o mes de novembro no calendario dos amantes do cinema.
Desde as primeiras edicións, o éxito acadado foi confirmando a demanda existente dun certame destas característica en Santiago, unha cidade que se reivindica como universitaria cun público novo e con ganas de sesións maratonianas de cinema, e onde máis dunha xeración medrou ocupando as butacas do Teatro Principal, sede inicial e principal das proxeccións.
Singularizado como escaparate da filmografía que non entra en circuítos habituais e con vocación non comercial, Cineuropa atopa así un lugar non só relevante senón imprescindible na oferta cultural de Santiago de Compostela e acada unha innegable complicidade co público. Con eses cinéfilos e cinéfilas cos que quixo manter unha relación de afecto e paixón mutua todos estes anos, e que son precisamente os que valoran, cos seus votos, os filmes, nun festival non competitivo.
Experiencia
Desenvolto con orzamentos públicos, é premisa do festival que prezos e bonos sexan accesibles e que o número de pases diarios sexan suficientes para que o público poida asistir ao maior número de proxeccións posible.
O festival vén medrando en contidos e en seccións outorgando lugar preferente ao cinema de autor en Galicia, para non ser só mostra senón tamén espazo que impulsa a creación e non esquece nunca a realidade social que nos rodea afondando en temas incómodos para facernos reflexionar, para facernos medrar a través da cultura.
Arraigado na cidade, o festival non sería posible sen o apoio de entidades públicas e privadas. E, por suposto, non sería posible sen a implicación do público que ano tras ano enche as salas, chora, sente e sofre coas personaxes que habitan cada unha das pantalllas.
DESTACADO POR:
- Ser a cita de referencia co cinema de autor en Galicia.
