Contexto
Dentro de Galicia, a cidade da Coruña e o seu entorno é un dos territorios onde podemos atopar máis micro-comunidades activas arredor da cultura dixital, especialmente colectivos maker, programador*s e creativ*s gráfic*s e audiovisuais.
O elemento en común das persoas destinatarias é o interese en compartir coñecemento arredor da creación e as prácticas culturais baseadas no colaborativo e no dixital.
Os principais obxectivos do programa son:
– Facilitar a participación activa da cidadanía en novas prácticas culturais e creativas.
– Crear espazos de conexión entre persoas, ideas e ferramentas dixitais.
– Realizar pedagoxía da colaboración e da participación nas prácticas culturais.
– Poñer en valor as colaboracións híbridas entre persoas con distintas competencias e grao de experiencia.
– Promover a consolidación de colectivos estables e autónomos a medio prazo.
– Potenciar o emprendemento sustentábel de novos proxectos sociais, creativos, culturais e profesionais na cidade.
– Inventariar e activar recursos e espazos municipais a disposición da cidadanía.
– Favorecer reflexións críticas sobre necesidades e retos da cidade.
Experiencia
Trátase esencialmente dun programa de mediación que busca facilitar a conexión das persoas interesadas na cultura dixital, no uso creativo da tecnoloxía e no emprendemento sustentábel de proxectos innovadores e con capacidade transformadora, ben sexan iniciativas creativas, culturais, sociais ou profesionais.
A estratexia principal pasa por apoiar a consolidación dunha comunidade ampla e diversa, o cal se realiza cun apoio estable a longo prazo e con mecanismos áxiles de comunicación e mediación. Conta tamén cunha programación de outono con obradoiros e accións divulgativas en diversos espazos da cidade.
O sitio web corunadixital.gal informa das actividades do programa municipal, pero tamén dá visibilidade aos colectivos, espazos, e eventos da cidade onde inspirarse, aprender e experimentar xuntas coa cultura dixital.
En 2017 incorpora o Laboratorio Audiovisual de Innovación e Creación da Coruña (LAIC), un espazo de encontro, colaboración e aprendizaxe para persoas e colectivos interesados na cultura audiovisual contemporánea, os novos medios e a transformación dixital.
DESTACADO POR:
- Ser unha iniciativa innovadora e pioneira en Galicia no achegamento ás novas prácticas da cultura dixital.
- O enfoque das accións resulta divulgativo, inspirador e activador, adoptando desde o Concello un papel de entidade facilitadora, non dirixista, dentro do sistema cultural e creativo da cidade.